2001 仔仔．燦爛

2001年7月1日，全家人包括仔仔，老公，我，囡囡，孫女同孫仔搬左去新屋，因為地方舊過以前，所以差唔多租金可以由1房1廳變成3房2廳，實用面積有7百幾尺，仔仔囡囡一家四口仲有自己間房添

仔仔到步第一日就同老公講”返屋企”，話佢知呢度係新屋企，佢都唔制，自己走去大門口，再帶佢入房話佢知呢間房係比佢地四個既，佢先乖乖地無再嘈要”返屋企”

一星期後係 IKEA買左個兒童帳幕比佢地，連包裝比仔仔睇，佢表現得好高興，但成個月後十幾箱野仍然原封不動咁放左係佢地間房，仔仔終於忍唔住，問老公要帳幕

我同老公夾手夾腳一日內清哂十幾箱野，打開佢地個帳幕，仔仔最大膽，一馬當先走入去，囡囡好細膽，唔入去，我貼埋哂ｄ魔術貼封住個入口，仔仔都係咁撞開魔術貼衝入去玩，好鬼開心，有時我都會迫埋入去同仔仔一齊玩

屋企人黎探我地時，仔仔竟然 Show off 佢個帳幕，將屋企人由大門口帶入房去睇帳幕，真係鬼馬

孫仔成日都吠，怕比鄰居投訴，我係外國訂左個 "Bark Free"返黎，有兩種模式，一種高頻只係狗先聽到，另一種低頻人同狗都聽到，掛係牆上面，設計有狗吠先會響鬧，實際係開閂大門鐵閘都會響鬧，我唔想開高頻佢係又響唔係又響我都唔知道，改開低頻，仔仔知道左我聽到低頻後，一日到黑走埋去對住部機猛吠，迫到我要收埋部機，老公笑我蠢過仔仔

仔仔最鐘意由大門口跑過兩個廳，再跑入涼衫房，有時佢會自己一邊踢住個波，一邊追住個波，由大門口踢到入涼衫房，好似馬勒當拿咁樣，自己玩都好開心，涼衫房有太陽時，佢會追住個太陽訓覺，太陽郁佢就跟住郁，我淨係睇住佢，已經好開心

囡囡蝦佢時，佢會走去另一間房避左囡囡，囡囡再迫佢時，佢就走入帳幕，囡囡唔入既地方，其實佢體重係囡囡既1.5倍，打交絕對係 sure win，只不過佢讓囡囡

未有數碼相機，無點同佢地影過相，仔仔係呢間屋住左16個月，最燦爛既時刻停留係我腦海入面，永不消失