2004 蜜月．東京

首次踏日~~東京14日~~唔識日文~~烏龍百出~~有驚無險~~鐵人之旅

主題 : 難忘

主角１：老公：水瓶座～風系星座～古靈精怪～好奇心重，要求唔食杯麵

主角２：老婆：金牛座～土系星座～追求穩定～美食主義，餐餐想食唔同既野

連續2晚婚宴後既蜜月旅行，初初識老公時佢己經話好想去日本，一直有種種不同既原因去唔到，最遠只係去左澳門同世界之窗，大家都未坐過飛機

今次真係出發，大家既感覺好似發夢咁，十幾年既夢想終於達成，我盡力安排得有咁精彩得咁精彩，有咁另類得咁另類，務求兩個都畢生難忘

***********

9個月前開始準備，買東京旅遊書，問朋友借書睇，上不同既討論區睇人地既遊記，再自己上網搵料，搵ｄ旅行團唔會去，其他人又未去過既地方，少香港人到既地方

想行程安排得順路，避開休店日，就岩搭車搭船時間，慳錢，改完又改，改完又改，都總有部份地方塞唔入個行程表，最後老公出手擺平 

老公為左放假旅行，放假前後一個月總共加班超過150個鐘，放假前一星期老闆提議我地推遲旅行，以現金賠償機票同酒店錢，我更係唔批准啦，改為提議我地一到步日本，即出電話方便公司隨時隨地搵到我地，最後老公每日係電話亭打一個電話返公司 

我係 Priceline 訂左機票同13晚池袋劇場酒店Semi-Double Room，7用尾係東亞銀行唱左一次円，一星期後又去百年找換唱多一次円，打算全程洗現金，最後唔夠先 look 卡，印左地圖～鐵路時間表～餐廳～樂園既資料出黎，自己訂裝左一本吋半厚既行程書，連埋買既東京旅遊書，一齊帶去日本，朋友教我帶唔要既舊衫去，著完唔要，留返空位放戰利品返黎，去桯行李上磅29.8KG

屋企2隻狗安排左屋企人早晚黎屋企餵飯，其他時間由得佢地通屋走，我要每晚東京時間8點打長途電話返黎安撫仔仔，唔係佢會發皮氣拆屋兼有排嬲

特意去買左2份人壽保險＋2份旅遊保險，實際受益人係仔仔同囡囡，間屋歸佢地，其餘錢係生活費，直止終老

我準備左九成計劃～老公拍板最後一成計劃～14日42餐不同既食物～經歷兩次颱風一次地震既行程正式展開 

*********

2004年9月27日 (一) 香港氣溫 28C 晴 / 東京溫度 20C 雨 香港~池袋

問朋友借左兩個飛美加既大旅行箱，一個 50L 既大背囊，朝早05:30 出發，約7點到機場，西北航空 Check-In 櫃位己經"休息"，之前問過 Priceline 位小姐話7點到就OK，只好搵地勤幫手，我地要求一齊坐，佢話無問題仲免費升級去商務客位，未出發先興奮，係 Pacific Coffee 食早餐，臨上機前老公更係要去吸煙室行一轉啦，一間細細既玻璃房，入面煙霧迷漫，伸手不見五指，真係無諗過咁靚既機場，吸煙室既抽風系統會設計成咁樣 

Final Call 影埋相上機啦，點知上到機發現係隔左一條走廊既雙連位，我兩個正準備商量邊個開口請其他搭客調位果陣，一位外國男人問我地係咪想調位，立即 thank you thank you．坐定定後上埋最後幾 pair 人就開機啦，順利乘搭 08:15 NW018 去紐約停東京，午餐食飛機餐，一落機東京落雨凍到飛起，搭15:24 京城本線特急列車，係日暮里轉車，雖然兩個旅行箱只得五成滿，我係無本事自己拎一個上樓梯，要靠老公上落兩次樓梯先攪掂，跟住轉山手線到池袋，順手買埋 IO Card 同 Passnet

酒店網頁張地圖太簡單，搵唔到點去酒店，向三個女中學生問路，竟然完全唔識英文，佢地走左兩條街後，再回頭返黎教我地點去酒店，酒店房15平方米，細到打開左個旅行箱行唔過人既，張床都唔知夠唔夠4呎，好似單人房咁不過佢比你住兩個人，又係之前問左 Priceline 位小姐，佢話4呎床不過間房既空間會細少少，好左有老公最著緊既洗 pat pat 廁所板

係池袋劇場酒店放低行李後，就去大黑屋買長途電話卡，Disneyland 同富士急入場卷，雖然只係平好少，但勝在唔洗當日排隊買飛，再去 Lawson 買三鷹之森入場卷，兩個睇圖攪唔掂部售票機，只好搵收銀員幫手，再係 60通Matsumotokiyoshi 藥房買左少少日用品

19:50 係南池袋 おはち食日式定食晚餐，全日行左三個鐘，24:00 訓覺

************

2004年9月28日 (二) 東京溫度 22C 晴 Disneyland

07:30出發，去Lotteria 快餐店食早餐，快餐都好食過香港好多，09:10 去到 Disneyland，門口排長龍買飛，不過我地買左可以直入，一入到去，老公拖住我跑去" Buzz Lightyear's Astro Blasters"排 Fast Pass，可以玩既時間係 12:00 ~ 13:00，11:10 睇左好靚既花車巡遊，日本人好整齊咁排排坐睇巡遊，電話亭有分打本地同打長途既，要搵岩個電話先打到返公司，又排左" Big Thunder Mountain"，"Splash Mountain" 既 Fast Pass，買左玩 Splash Mountain既相留念，避免食飯時間餐廳人多，買左用松鼠外型 mug 裝既甜 pop corn 頂住肚先，14:00 園內Plaza Pavillion Restaruant人少先坐底慢慢食，一份簡簡單單的三文魚餐加多一杯可樂兩個人食，好好味，仲帶走件比BB用既米奇口水肩添

15:00 排左" Hanted Mansion" 既 Fast Pass，可以玩既時間係 21:10 ~ 21:55，坐Western River Railroad 遊覽期間，奇怪見到日本女仔係觀光火車訓覺，再排隊係門口既 Halloween 造型佈置影相，我地淨係請專人用自己部相機影咋，遇到特制2004 Halloween Mickey Mouse 外型mug 裝既 pop corn 車，無理由一場黎到唔帶件咁特別既 Mickey 返去留念架嘛，今次買咸 pop corn，19:30 睇花車巡遊，周圍搵好大隻既"雞脾"醫肚，原來係火雞脾先真，20:30 再睇埋放煙花，買埋少量手信，22:00 走人，坐 JR 見到大部份都係香港人，個個都大袋細袋手信，其他時間玩左 Cinderella Castle Mystery Tour，Alice's Tea Party，StarJets，MicroAdventure，Space Mountain同Star Tours，老公好滿足全日玩左11個 game

係池袋食晚餐，入左一間自己入錢買飛既麵店，兩個都好肚餓買左兩個加大，點知份量大到兩個人都食唔哂一個，迫住靜靜雞偷走，全曰行左10個鐘，01:00 訓覺

27晚香港黑雨, 屋企無人只得2隻狗, 屋企人話我知朝早去餵飯時, 發現仔仔喊到成面, 成頸都濕哂, 乜咁架, 唔好將我兩個既快樂建築係仔仔既痛苦身上好喎

*************

2004年9月29日 (三) 東京溫度 22C 大雨  海浜幕張 Outlet

09:30 出發，係 KFC 買左一份早餐兩個人食，都係好味過香港，買左 JR one day pass，去新宿買定過幾日去富士急既巴士乘車卷，本來我安排坐山手線去東京轉京葉線，老公即場改坐中央快速去東京轉車，車程快左11分鐘，但就要跑樓梯去月台追車，去左海浜幕張既 Garden Walk Outlet Shopping，因為落雨關係，下午返池袋行街改為係 Garden Walk Shop 足全日，佢地既袋好特別，先用紙袋裝住你買既野，再係上面倒轉加一個膠袋，係完全唔怕落雨會整濕入面既野

15:00 係 Mall 既 Food Court 買左和幸既吉烈豬扒＋蝦，同京樽既壽司 Lunch Box，吉烈豬扒超級好味，外脆內軟有肉汁，下午對腳板起水泡，入鞋舖買鞋墊，用手勢話店員知我想借 Scissors，即加鞋墊先可以繼續行，衫褲鞋襪運動袋都有買，仲買左個 50L 大背囊，基本上樣樣都算幾平，質料係耐著既，可惜對 Camel 行山防水鞋只有我既 Size，無老公既 Size，最後我果對都無買到，跟住落黎日日都落雨就慘情啦，20:00 係火車站既 Becker's餐廳食左咖哩吉烈豬扒同漢堡扒餐，返到池袋去左 Family Mart 買埋罐啤酒就返酒店休息，全日行左7個鐘， 24:00 訓覺

颱風米雷 (Meari) PAGASA:Quinta ~4級颱風，強度 165km/h，米雷在九州南部登陸

*************


2004年9月30日 (四) 東京溫度 18C 早晴/午雨 八景島~Bayside Outlet

06:30 出發，濕鞋吹左一晚冷氣仍然係半濕，只好照著，老公帶埋個大背囊出去，係火車站買左一碗天婦羅雜菜 Soba 兩份食，買左橫浜 One day pass, 中途轉坐 Seaside Line 無人架駛烈車，去左橫滨八景島，近距離見到唐鵝，入埋水族館，仲有好多比幾歲幼兒坐果ｄ卡通搖搖車，我地變左大細路咁同不同既卡通車影相，買左雪糕食

13:00 係園入面間 la mer bleu 西餐廳叫左咖哩海鮮餐兩份食，15:00 去左 Bayside Outlet Shopping，Shop 到去19:45，又係衫褲鞋襪都買ｄ，原來女性買衫只可以試開胸衫，唔可以試成件過頭果種，我試完出黎女Sales 見我無化妝先無咁黑面，落雨取消左去紅磚倉庫同 Queen's Square，22:00 係池袋間燒肉備前食放題，係 Family Mart 兩個自己用售票機買左六本 Mori Tower 同東京鐵塔入場卷，同埋罐啤酒就返酒店休息，全日行左8個鐘，01:00 訓覺

*************


2004年10月1日 (五) 東京溫度 22C 早晴/晚雨 淺草~上野~秋葉原

09:00 出發，比安排遲左一個鐘，又係照著半濕鞋，老公帶埋個大背囊出去，係 Becker's 叫左兩份西式早餐，好好味，跟住去淺草雷門，同老公一人買左一件最簡單果款日式浴衣，14:30 到預早安排既鰻登亭食午飯，再去上野多慶屋買食落肚既手信，行阿美橫丁，路過買左章魚丸，超級好味，再行Yamashiroya 玩具店，然後去秋葉原行街，地上發現"千代田區路上禁煙地區"標誌，條街真係無人食煙架喎，地下又無垃圾，好乾淨架，去行電器商場，上吓又一層，上吓又一層，去到唔知邊層，周圍既電視都播 AV片，無數咁多既日本中老年男人望住我，只好低頭用最快速度搵自動電梯走人，兩個人返到地面足足笑左5分鐘， 原來大門口位置有寫樓上賣 AV 架，係我地唔識睇

之後入左附近既成人商店 M's Akihabara，入面有後生既男女，買左幾件質料好靚既睡前服同香薰，比錢時收銀員指指牆上既相片，相片是其他客人即場試著既倩影，越性感折扣越大，由9折到3折都有，我笑笑口擰擰頭付全數走人

21:00 取消去天井，改左去和民食晚餐，全日行左7個鐘，24:00 訓覺

***************


2004年10月2日 (六) 東京溫度 22C 早晴/晚雨 自由之丘~代官山~涉谷

09:00 出發，比安排遲左一個鐘，又係照著半濕鞋，我同老公一人帶一個大背囊出去，到 Doutor 叫了 Pancake 同一份西式早餐，好味道，跟住去左自由之丘 Shopping，向一個中年日本女人問路，佢識英文仲帶我地行左10分鐘，呢度係用駕空電纜，令我好似返去幾歲時入粉領農場玩既感覺，目的係買婚宴回禮手信同我最鐘意既音樂盒，玩左兩個鐘，老闆娘好親切，試聽左幾十個音樂盒，仲好熱心咁招待我地，搵唔到 Somewhere in Time，最後買左"同一屋簷下2"溫暖的詩句既水晶音樂盒

12:30 去左 Poeme De Mary 食西餐，我一邊食一邊等，等左一個鐘頭老公先返黎，我幾驚佢有意外，原來餐廳附近無可以打長途既電話，佢要行好遠先搵到個電話亭，加上講左30分鐘電話，一來一回成個鐘，食完飯轉去代官山，行狗用品舖頭，Full Dog～Diesel Jeans～Good Life～Just Dog Market，買左2個去街袋，唔係走佬款，可以 show 個狗頭出黎，經過水晶店，買左個銀髮水晶球

18:00 去左預先安排既涉谷 Mark City 梅丘壽司美登利，排左80分鐘先有位，食左50分鐘，散叫左刺身同幾件壽司，食物好新鮮，其中有件活海老壽司黎到仲識郁，但醋飯同醬汁唔特出，令成餐飯變得平平無奇，唔值排咁耐，隔離個婆婆仲食得多過我兩個人（呢間係公司幾個董事話每次去東京必食之店，可能同佢地唔會神早起身去築地有關，下次聽推介要考慮埋果個人既身份地位先掂）

20:45 轉去銀座行街，見到有間大會場好靚，好多日本人著靚靚和服去入去睇表演，全日行左5個鐘，23:00 訓覺

**************

2004年10月3日 (日) 東京溫度 20C 大雨 原宿~涉谷

08:00 出發，又係照著半濕鞋，我帶左一個大背囊出去，去左McDonald 食早餐，又係好味過香港，去左預早安排既原宿神宮橋睇 Cosplay，可惜落大雨，無得睇，入左公園行左陣，越黎越大雨，轉去行 Snoopy Town，同附近既店舖，DASIO 100円店，盡量留係室內行，14:30 千辛萬苦先搵到預先安排既關西風燒餅，餐牌無英文，只好亂點，叫左四份，追加兩份，但只食得落追加兩份既餸，普通好味但幾好玩，原來要叫 Green Tea 先係免費，叫 Tea 係比烏龍茶，飯後取消行涉谷，改左去池袋西武行室內，係 Pet Farm Ikeda 時，見到寵物箱入面隻狗仔訓果張地毯毛巾好掂，任佢地亂爪亂咬都完好無缺，即買三條，另外幫同事買左本加大Size既書，退完稅就返去酒店放低大背囊再出去

19:00 返去預先安排的涉谷元祖屋食鯨魚，可惜已結業，落大雨加上夜晚好凍，去左隔離 Uniqlo 買冷衫，再改去附近既蟹道樂食晚飯，全日落大雨，牛仔褲濕到上大脾，對鞋超重，好辛苦，好彩安排左一間房比我地，即時超興奮，可以隨意無儀態咁食，食吓休息下又食吓，叫左一個松會席兩個人食，岩岩食得哂，超級好味道，我地掛住食其他，蟹腳燒到濃濃地，本來好想買果隻銅造的蟹型煙灰缸，但因為前幾日已經買左好多超重既禮物，迫住放棄，食到 21:30 先走，全日行左7個鐘，23:00 訓覺

************


2004年10月4日 (一) 東京溫度 17C 早雨/午陰  築地~汐留~台場~銀座

06:30 出發，又係照著半濕鞋，07:00 去到場外巿場行左個圈，落大雨燒帶子無開，老公睇完全部壽司舖，決定入24小時開門，得幾枱全部日本客既喜代村本店度食，無人排隊直入，入面好大有兩層可以坐幾十人，入到去人地清緊收銀機，等左15分鐘先帶我地埋位，叫左個 Toro Set，同一件海膽軍艦，Set 有一件手卷，2件大，2件中，2件赤身，2件軍艦，加2件唔知乜東東部位，湯同沙律，超級好味道，食件手卷時第一啖比左老公食，跟住不自覺咁自己食左九成，老公要再食時先發現剩返個尖尖未食，08:13 埋單走人

再去蔡 San 推介既壽司清本店，要係門口排隊等開門，入面只得十幾個位，入到去大部份客唔係講國語就係講講東話，散叫左7件壽司，魚肉除左新鮮無特別，感覺上佢地係歡迎日本人多過遊客，09:12 埋單走人，好在都叫食左一間超級好味既，否則會好失望，係 JR見到有壽司大既廣告，我話下次要試呢間

09:30 跟住去左汐留行 Caretta 商場，有好多唔同款既 Chair，部份仲係 Designers' Chair，其中一層有一角落係吸煙區，抽風系統超級正，企隔離都聞唔到煙味，唔好話見到ｄ 煙，再上幾層，又有一個吸煙位置，要推開玻璃門，行十幾步直入，再推開玻璃門，再行多十幾步近露台邊先有煙灰缸，老公話似有部西片，煙民聚係度食煙，特然成個露台跌落街，果度B2F有隻大石龜，會根據時間表黎噴煙，穿過隧道去到日本電視台大廈，見到名藝人既面同手印石膏，再去左台場行街，13:00 去左 Sunset Beach 食buffet lunch，買左百合海鷗號 one day pass

15:30 坐左去有明總站，空氣好好呀，途中睇見富士電視台大樓， 船的科學館，日本科學未來館，通信中心，松下中心，Tokyo Big Sight，中途有落車去地面行吓影吓相，仲比我估仲左上面睇落去係水池，內裡係廁所既建築物，回程返到 Tokyo Decks 時，竟然發現我搵左9個月都搵唔到地址既 SEGA Joypolis，入面有好多大型超刺激既遊戲機玩，可惜無時間多出黎，要入去玩就要放棄跟住既節目

最後老公決定下次再去日本時預留一日去玩，今日繼續我地安排好既行程，就係坐岩岩開左幾個月既 Himiko 觀光船，係架好似蝙蝠車咁既銀河鐵路999船，由海浜公園經過彩虹橋坐30分鐘去日之出棧橋，全日只得4班，我地坐最後一班16:50開出，亦係唯一的搭客，變左包左隻船，入面有千年女王，無面車長同星野鐵郎既紙板公仔，兩個即時變成大細路，每一個都影相，交換位置又影過，你影我，我又影你，隻船地板同天花仲有幻彩變燈添，姐姐一開船時幫我地影左一張合照後自動消失左，任得我兩個發癲，真係超級興奮

19:30 去銀座我地期待已久既牛庵食神戶牛，早幾日係酒店請職員幫我地訂台，係一間好傳統既日式食店，星期一晚都好滿，一去到講個英文名就知係我地，全場都係日本人，好多日本女侍應幫緊食客煮 Shabu Shabu，我地叫左一個竹定膳西冷餐150g 加一個最貴既特選單品Filet150g，一枝細日本清酒，每人派左件紙圍裙

首先上牛佃煮，再上燒帶子前菜同牛肉刺身，再黎兩件牛都係鐵板上，淨係燒熟個面，入面紅色但毫無血水，跟白飯同醃漬物＋味噌湯，老公話食哂件西冷先好開件Filet，件西冷好好味，跟住食件Filet，嘩好味到講唔到野，好香既牛肉味再加入口即溶，基本上完全唔需要咬己經可以吞落肚，唔想咁快吞落肚就真，完全想像唔到成吋厚既牛柳都可以入口即溶，證明厚薄同係唔係入口即溶係無直接關係既，食完女侍應幫我地影合照，可惜2個都年紀大，2張都手震濛查查，不過唔緊要啦，印象都好深刻，呢餐係第一餐要比5%服務費，20:45 埋單走人

由於太高興，返到池袋去左打波子機盡興一下，好快就打左5000円，再去Family Mart 買埋罐啤酒就返酒店休息，全日行左5個鐘，24:00 訓覺

************


2004年10月5日 (二) 東京溫度 16C 大雨 六本木~東京鐵塔

09:30 出發，終於可以唔洗著半濕鞋出去，去左松屋叫左一個生姜豚肉定食，本來安排左去海浜幕張果日下午去行池袋附近，因為落大雨取消左，今日補返去，去左行 Sunshine City，入左 Namja Town 同 Ice cream City，係間小兒科鬼屋嚇到我死死下

係 Morinaka 買左 Pancake with Ice Cream，朱古力蛋糕，同牛乳布丁做午餐，牛乳布丁好好味呀，原來係好出名既富良野Furano Delice 既牛乳布丁，食完洗乾淨個樽連蓋連特長 Spoon 帶埋返香港，跟住去左 Tokyu Hands，比我買到之前係香港地鐵月台跌左只有1mm厚超輕既化妝鏡同超輕雨傘，退完稅跟住去左六本木，有隻大蜘蛛係地面，去左 Mori Art Museum 參觀，前幾日已經買左飛，明知落大雨無野睇，都要入52樓展望台參觀，果然係濛查查，乜都睇唔到

15:15 經過六本木隧道時，聞到好香攪到有ｄ肚餓添，發現有小食店賣腐皮壽司，係豆狸Zone 左2件黎食，好好味喎，係繼 N 年前係香港食過好難食後第一次再食

18:00 就去左預先安排既禪食 Shabu Shabu 放題，我地叫左6盤，每盤6片，每片有大半張 A4 紙咁大既黑毛霜降和牛，仲有野菜，細清酒，真係好好味，去到第4盤我已經停手食唔落，老公仲食得落第5盤，佢好想叫第6盤，叫我幫下手，我話最多2片，叫住佢唔好再叫，佢不停話好味好味，最後第6盤食淨2片，女侍應間唔中會走埋黎幫客人整走肉碎浮游物，21:00 埋單要比10%服務費，好在用左10% off coupon，食完飽得滯行左陣先去搭車，本來安排左去埋東京鐵塔，又係落雨取消左

即場改左係六本木坐都營大江戶線去新宿轉 JR 埼京線返池袋，係新宿站行左好耐好耐又上又落都未行到去轉車月台，老公見到2分鐘後有山手線返池袋，即係又要跑樓梯去月台追車，我話山手線要坐5個站會耐過埼京線1個站，加上好飽唔跑，結果係行左成20分鐘有多先行到去埼京線月台，一路行去埼京線月台我一路問新宿站係咪全世界最大既車站，下次記住除非係 JR 線轉 JR 線，否則盡量避免係新宿站轉車

返到池袋去左 Family Mart 買埋罐啤酒就返酒店休息，22:00 遲左兩個鐘先記得打電話返香港比仔仔，屋企無人聽電話，再打屋企人手機，佢地等到岩岩先走人，即刻再返上樓，屋企人話仔仔夠鐘就坐定定望住個電話，叫佢食飯先都唔彩人，坐左足足半個鐘先無哂心機去食飯，屋企人返到上樓接左我電話，叫仔仔黎聽時，佢發皮氣走左入房唔聽，大件事啦今次，前幾日佢係聽完我個電話，鬆毛鬆翼咁去食飯架，全日行左6個鐘，24:00 訓覺，老公食得飽得滯半夜起身嘔 

*************

2004年10月6日 (三) 東京溫度 21C 晴 三鷹之森~吉祥寺~下北沢~新宿

08:00 出發，再次著半濕鞋出去，去左 Wendy's 食早餐，跟住搭 JR 去左三鷹站門外轉搭貓巴士去三鷹之森美術館，館入面好多野睇，好新奇得意，館室內，入面用中英文及圖樣寫住唔準影相，但都有人不停影不停影，再去館室外，上左樓上同天空之城機械人影相，好多人淨住影，等好耐先可以有位單獨影相，好在我地唔係宮崎駿迷，否則銀包會出血，只係買左隻貓巴士玻璃紙震

12:00 走人，經過一個大公園，行左去吉祥寺，呢度又係用駕空電纜既，行左 Animal Gang，跟住去左小さな築地食 Lunch，間舖舊舊地，唔知點解我突然唔想食魚生，我叫左西京燒銀鱈魚定食，老公叫左雜錦魚生定食，呢餐係黎日本之後唯一難食既飯餐，老公一向唔睇大啖大啖咁食，突然個咀入面好痛，仲流血添，再係咀入面拉返條魚骨出黎，條骨有成吋半長，唔再食埋單走人

跟住去左下北沢，行左水晶店 Stone market，買左個超清深紫色水晶球，一粒好似閃靈鑽能量既白水晶吊咀同一對蓳青耳環，價錢係香港既一半，點可以唔買呢，跟住去左狗用品舖頭 DOG, 返去新宿，再補去返東京鐵塔，終於可以係高空欣賞東京夜景啦

19:35 去左博多天神食豚骨拉麵，每人叫左一碗，實在太好味，我連湯都清哂，飽到上喉嚨，我地見到老闆放好大舊頭骨落去煲湯，佢好好人架，隔離有個學生哥，食完要求免費加多個麵，老闆見佢差唔多無湯，免費送多碗湯比佢

20:00 打電話比仔仔，好彩佢只係地下尿尿左，嬲左一晚咋，有聽我電話，又無拆我間屋，真係乖仔

返去池袋，入藥房幫老闆搵化妝品，入面真係好多人架，返到酒店同老公因小事鬧咬，整單大野攪到心輪好塞添，再去Family Mart 買埋罐啤酒就返酒店休息，全日行左8個鐘，23:00 訓覺

**************

2004年10月7日 (四) 東京溫度 18C 晴 富士急～河口湖

06:30出發，可以著乾鞋出去啦，係房門口掛左請勿打擾個牌就出去，無放底門匙係Counter，夜晚會係河口湖溫泉酒店過夜，老公拍板最後一成計劃時話旅行期間時間就係金錢，唔好浪費時間執野同 Check-in Check out，所以豪左一晚酒店房錢，我好肉赤架，驚富士山會凍帶埋件冷衫過去，首先去左 Kinko's 燒左ｄ相落 CD, 再係車站 Newdays 買左飯團＋腐皮壽司同綠茶，07:40 係新宿搭第2班巴士去富士急遊樂場，原定100分鐘車程09:20到富士急，樂園09:00 開門，中途會停一次去廁所，但塞車遲左1個鐘先到，下次再去時唔想搭巴士，改搭JR但要轉車同貴囉，唔知係咪食左飯團，兩個都睡魔急Call 咁，係車訓醒4次先落車，呢邊ｄ空氣好清新

一去到即刻去影相印通行證，老公隊到個頭好埋黎影，張相成個傻佬咁，然後拖住我跑去最近門口既"King of Coasters"排隊，玩完即過隔離既"Dodonpa"排隊，好好彩我地可以坐最前既車頭位，開車訊號叫完仲未開車既，就係我兩個對望開口講野果一刻即開，食哂ｄ風落肚，嘩好快好快，網頁話有最高速度172km／h，最驚險係有個位90度直沖落黎，好似成架車離開左路軌，零空跌落黎既感覺，臨玩完前有個影相位，老公做左個鬼臉，平平地買左張相留念，成個人經過完高速震盪，連本來好塞既心輪都變返平時咁樣少少塞塞地，正呀，否則返到香港要慢慢用水晶打座先會變返平時咁樣

13:00 係園內小食店買左章魚丸＋燒尤魚＋熱狗＋可樂做午餐，跟住去左玩" Red Tower"，原來上到最高等跌落黎果刻係會驚架，果刻我唔識講野，但一跌落黎就好興奮，再跟住去左排" Great Zaboon"，每人買左件雨衣，因為有好多水會炒到上"Red Tower"咁高再跌返落黎，有個十幾歲鬼仔好勇唔著，最後好似著哂衫褲跳左落泳池咁款，其實唔想比錢買可以著二手，個個著完一次就放入雨衣收集箱

轉去玩"Moon Raker"，"Panic Lock" 我叫到好大聲，即係唔驚囉，跟住去坐 "Shining Flower"，佢每隔幾個箱先有一個係全透明車箱，普通既可以即坐，我點都要排透明車箱，開始坐時好開心，點知上到最高，望落透明車底，好驚呀，兩隻手出哂汗，快ｄ快ｄ轉返落地面啦

老公本來一直好期望可以入"The scariest haunted house "玩，原來要玩45至60分鐘咁耐，而我係唔玩既，佢唔放心我一個人自己係出面等咁耐，我話自己去坐"Bumper cars"或周圍行下，呢ｄ無危險好安全，佢都係唔放心，好似驚有人會捉左我去割器官咁，最後佢決定唔會比自己有一個可能會後悔既機會出現，放棄左入去玩，話等下次再黎先玩，其實大家都知下次再黎咪又係得我地兩個

咁見少人排"Great Zaboon"決定玩多一次，16:30買左雪糕同香腸做下午茶，影左富士山做背景既雙人相，本來想再玩多次 "Dodonpa"，但有百幾二百人排隊，每架車只可坐8個人，排兩個鐘都唔到我地，走人啦，全日玩左7個 game

17:00 安排左坐富士急行線去河口湖，問左車長佢話搭第2班車，係呢個月台等就OK，越郊外既人英文越好，老公又睇左行車時間表，我見到有架卡通車黎好開心，影埋相就上車，坐坐下老公話好似唔岩方向喎，我話車長話係呢個月台上車岩架啦，完全唔記得佢話第2班車，到停站時老公話不如落車睇清楚先，我唔願落車，其實富士急站去河口湖站只係要坐一個站架咋，我發神經完全無左件事，一直坐好耐都未到下個站

咁岩職員黎查飛，佢話我地坐錯車，要係下一個站落車，再轉車去返頭先上車個站，再轉車先可以去河口湖，呢一個站足足坐左幾十分鐘鐘，老公開始不停咁鬧，係我衰唔聽話，本來18分鐘車程，最後坐左78分鐘，去到河口湖天黑齊啦，又無乜街燈，本來諗住打電話叫人黎接我地，但又怕佢地唔識英文，好在我係日本地圖網站印左張超級準確既地圖，連一條小巷都有，老公跟住地圖，帶我行左4分鐘，終於去到湖南莊溫泉旅館

我係日遊網請大石兄幫我搵溫泉酒店，要有貸切風呂，無其他要求，佢幫我搵左呢間湖南莊最平果種房，仲話無其他網友住過，住完記得報告下情況，間旅館有42間和室，23間和洋室，有露天風呂同貸切風呂

18:30 Check-in 時預約左19:30食晚飯，同約埋最後一節23:00 - 24:00 既貸切風呂，住605號房，發現間房好大，係望河口湖既和洋室，係房玩左陣就落去食飯，我地係後面條樓梯落去，見到自己個”姓＋樣”咪入房囉，原來係部屋食懷石料理，好多野呀，一定食唔哂，岩岩開始食，有個女侍應推門入黎見到我地食緊，表現得好驚，可能佢係前面見唔到我地落黎，以為我地未到，食食下又加食物，食物好味但實在太多，我要食吓休息吓，又食吓，最後白飯完全無食過，食左1個鐘就收工，食完仲要浸2次溫泉

食完飯周圍行左陣再出街行左陣買埋啤酒，21:00返入房準備去浸溫泉，一開門發現開左燈既，頭先明明閂左燈先出去，雖然度門無西式酒店咁實淨，都無理由有賊唔洗爆門就入到黎，再行入ｄ先發現原來職員已經開好Tatami，同老公各自去浸大浴場，約左90分鐘後返房集合

我未浸過溫泉，見到無間隔咁沖涼真係有ｄ怕羞，好在全場只得一個婆婆，行出去望下個露天溫泉，一開門好凍，都係唔出去，係室內浸算啦，好舒服，浸完過左隔離休息室，有按摩椅加塊腳底按摩板係埋度，一跳上去好正呀，全身浸完溫泉既肌肉鬆返哂，由頭到頸，到背，到腰，到 pat pat, 到大脾，到小腿，到腳板底都同一時間按摩，仲正過真人按摩，真正係由頭到腳指尾升仙級既享受，明明夠鐘上房都嘆多10分鐘先走人，老公話男賓都係有按摩椅加塊腳底按摩板係埋度，佢更係嘆左啦

23:00 去貸切風呂，果度有幾間房，係房內可以盡情咁玩，撥下水，影下相，可以推開玻璃門透下氣，玩到過哂鐘，自己交低條門匙係收集箱就OK，全日行左7個鐘，24:30 訓覺

東京地震，我地係河口湖乜都 Feel 唔到

*************


2004年10月8日 (五) 河口湖溫度 12C 大雨 河口湖~新宿

朝早起身排左好多宿便，溫泉加按摩除左係升仙級既享受外仲有益身心添，08:00起身梳洗後，落樓下部屋食早餐，又係好多野食，係和洋式，我飲左蟹湯同食左少少其他，食唔哂果ｄ比老公清左佢，食完周圍影下相，又開始落雨，影唔到靚靚富士山添，再去大浴場浸溫泉，打左電話比仔仔，話比佢知提早打電話比佢，今晚打唔到電話，叫佢要乖，10:30 Check out，迎送車我地去河口湖車站

買左復古巴士 one day pass，第一站去木之花美术馆，係門口附近影下紅葉，花花草草，再去久保田一竹美术馆，都係門口影下相，跟住兩個傻傻地周圍搵下有無露天混浴風呂，之後去左UKAI 河口湖オルゴールの森，買左入場卷，佢地好環保，唔用雨傘袋，而係每一個室內外轉接位，都有大量雨傘提供，入面係一個大花園，乜野花都有，園藝修剪得好靚，有音樂噴泉，歐陸色建築，12:30 係園內食西餐，之後去左睇樂器同聽音樂表演，買左香薰同蠟燭，然後參觀下香水の舎，去埋隔離既ハーブ館，學左穿單一粒的珍珠 necklace，買左對粉橙色既珍珠耳環，開始好凍，早ｄ去巴士站，問左車長，佢話可以提早搭巴士返新宿，氣溫下降到只得12度，我好彩叫有件冷衫加件牛仔褸，老公只得短 Tee 加風褸，兩個凍到入心入肺，頂唔順跳左入巴士站閂門，見到有巴士黎先衝出黎睇，衝左4次先係返新宿架巴士，18:00上門，落雨大塞車，20:50先返到新宿，本來安排左去蟹道樂，前幾日已經去左，今晚取消

古靈精怪既老公提議去M's Ikebukuro睇下有無有趣又新奇既野，之後23:00 去左Denny's食西餐，返左酒店放底手信，再冒住橫風橫雨去 Kinko's 店，老公要上網攪公司野，一來一回返到酒店後，兩個全身由頭濕到落腳，有雨傘都無用，全日行左8個鐘，02:00 訓睡

颱風馬鞍 (Ma-on)PAGASA:Rolly~5級超級颱風，強度 185km/h，馬鞍在日本伊勢半島登陸

************


2004年10月9日 (六) 東京溫度 17C 大雨 新宿

10:00 先起身，本來安排左一早起身去後樂園 Tokyo Dome City Attractions 同 LaQua，超級颱風光臨迫住取消，11:20 係吉野家食牛肉飯做早餐，改為上半部行新宿，行左京王百貨，My Lord，ABC-Mart，15:45 去左預早安排食晚餐既玄品食河豚，有刺身，有炸件，有放湯，我地兩個都唔識欣賞，唔明點解咁多人冒死都要試，新宿好嘈，地上有好多煙頭，周圍ｄ死飛仔好似 Take 左野咁，17:30 返左池袋西武百貨行街，21:30 去左回し鮨　若貴食迴轉壽司，全店劃一價，我由香港帶埋張壽司圖去，可惜有相有中文無日本，只好靠估咁叫，同等人地叫海膽時，我地又要咁咋，2個人食左12碟，好味

再去左60通既 Prego 打 Pachinko 波子機，又係唱左5000円打完就算，老公話咁快就打完2500円，我就睇下周圍既人打，見佢地不停咁睇部機最高上面既資料黎簡機打，全日文我都唔識睇，唔理咁多坐底玩，到我射埋最後一粒波子，起身走人果一刻，隔離個叔叔拉住唔比我走，然後送左幾隻手裝既波子去我部機，要我不停射波子出去，原來我仲左大獎，即時跌左好多波子出黎，一個盆唔夠裝，職員運左幾個盆黎，到唔再跌波子出黎我就走人，我送返ｄ波子比叔叔佢唔要，只好不停多謝人地啦，帶波子去數波子機度數波子，係櫃台見到好多唔同既禮物，禮物下面有個數字，估計係指需要波子換購既數目，職員不停咁講左好多日文，我地完全唔明佢既意思，攪左好耐，終於明白，3550個波子可以換3個大特殊景品，4個小特殊景品，1包煙同1個豆沙餅，佢比左3大4小牌仔連一張地圖我地，咁我地跟住地圖行，去到一個好似找換店既櫃位，好多人排緊隊，將3大4小牌仔比佢，佢比返1萬円我，好開心，估唔到可以免費咁玩左2次波子機，全日行左8個鐘，24:00 訓覺

****************


2004年10月10日 (日) 東京溫度 18C 晴 池袋~香港

10:30 收執好所有行李，2個飛美加既大旅行箱，2個 50L 既大背囊全部滿哂，開始擔心會過磅，係酒店寄存行李後，去60通藥房同 Tokyu Hands 買少少野，再去花月嵐食拉麵，食完再去西武百貨禮品部，買左幾盒高級包裝既零食，13:50返酒店出發去機場，我同老公每人背一個50L 既大背囊，我帶住架比較細少少既旅行箱，老公帶住架大既，佢果架個車輪有ｄ問題，旅行箱好似隻未受訓練狗咁樣，自動向左飄向右飄，淨係唔肯乖乖地向前行，朋友話有旅行箱唔要可以借我用完就掉，點知會有咁大問題呢．

星期日中午條街超級多人，行左40分鐘，終於去到池袋站閘口，好彩我一早搵定2號閘口有升降機去1503月台，14:45 坐 NEX去機場，諗住去到機場食午飯，坐18:30飛機返香港，由於5級超級颱風關係，好多班機推遲左，日本兩間航空公司有幾行櫃位，其他航空公司就幾間迫埋一行櫃位，排左100分鐘都仲離櫃位2行蛇餅，地勤邊行邊叫西北 Final Call，我地終於可以Check-In 啦，2件大行李上磅，顯示36KG，原來地勤太心急，將大果個行李箱有半邊踏左上磅側，咁先唔會過重

18:00 好順利咁收Boarding Pass，入到去場面都幾嚇人，周圍都好多好多人，又好嘈，搵到我地個閘口，好多人分左2行排緊隊，原來 Over-book 左，一行排上機，一行排自願放棄機位，2個位有美金1000補償，另加明早免費升級至商務客位返港，我地兩個都預先請多一日假係屋企休息，我極力遊說老公出讓機位，我地可以係附近搵間有大浴場既酒店休息一晚，明早再飛返香港，仲有半日可以休息，可惜佢拒絕放棄機位，佢個心一早飛左返香港上網睇公司 email，見佢頭先咁辛苦帶住隻狗已經唔高興，唔想再去野佢，我地搵個位坐底慢慢等，有個飛機師行過見到咁多人係閘口排隊等上機，其實真係只有呢個閘口有人排隊等上機，用嘲笑語氣講”HK people"

一邊等一邊睇，發覺排緊隊既人既手提行李都幾誇張，有人既BB車唔係裝BB，而係裝滿行李，再加幾大袋，BB就自己手抱，有人係成盒電器大紙箱加大手提袋當手提行李，終於等到放人上機，我地上到機知道點解咁多人排隊啦，佢地霸埋前前後後幾格既手提行李位置，我個50L大背囊就搵空姐幫手放左去無雷公咁遠，老公果個因為放左我個水晶音樂盒，天然水晶，玻璃禮物，佢死都唔比空姐放，諗住放得人上機都差唔多可以開機，點知要等抽返起自願放棄機位既人既行李，我地太肚餓，食左少少零食做午餐，跟住又見到ｄ人落機，佢地話等得太耐，而家先黎自願放棄機位，隔左陣又見佢地上返機，因為夠位唔再需要人放棄機位，21:15食飛機晚餐，食到乜都清哂，老公就將個50L大背囊塞係腳前面3個幾4個鐘，辛苦哂佢啦

返到香港坐巴士返屋企，一入門口見到仔仔囡囡好開心咁歡迎我地，因為連佢地都未食晚飯，食完晚飯仔仔就繼續嬲，好在嬲左1日就無事

************



屋企個磅顯示2個行李箱重60kg，加埋2個50L大背囊，共重90kg，14日行左我地1年行既路，Shop 左10年既野，每日1枝500ml 可口可樂2個人飲，日日情緒高漲心情抗奮，完全滿足到難忘呢個主題

狗用品：7件＋食品：27件＋袋：6件＋衣服：48件＋其他：128件＝合共216件物品

用剩左12萬8千円返黎，我地都唔係買得好瘋狂，只係物件重姐

用 Photoshop 執完 D 相部分瓜左，好在係日本燒起左前10日既相，後4日既相部份無法補求，貸切風呂入面影既相全部瓜左

********************


六大難忘美食

2004年9月29日午餐和幸～吉烈豬扒：670円

2004年10月3日晚餐蟹道樂～松會席：6353円

2004年10月4日早餐喜代村本店～Toro Set + 海膽軍艦：1971円

2004年10月4日晚餐牛庵～竹定膳：4800円＋特選單品Filet：7000円＋清酒：1000円

2004年10月5日晚餐禪～黑毛和牛放題：12800円＋清酒：1200円

2004年10月6日晚餐博多天神～拉麵：1550円

****************

八大難忘事件

2004年9月27日～升級至商務客位：免費

2004年10月1日～亂闖AV陣地：免費

2004年10月4日～Himiko 觀光船：1400円

2004年10月6日～三鷹之森美術館：2000円

2004年10月7日～富士急遊樂場：9000円(連巴士來回新宿Package 13800円)

2004年10月7日～湖南莊溫泉住宿一泊二食：24000円 (貸切風呂 3000円另計)

2004年10月9日～波子機：免費

2004年10月10日～拒絕放棄機位：補償美元1000 + 升級至商務客位