2003 敏感．威脅

一向都有皮膚敏感，唔係對食物敏感，而係對污濁既空氣敏感

只係去過信和中心兩次，兩次都出事，經扶手電梯上到二樓，面同頸都開始紅同癢，未成功上過三樓

1月專程上深圳東門商場做窗簾，好彩一到步去左香格里拉酒店Check-in，否則可能返唔到屋企

落巴士後經過一個地盤，路上有小販，短短分幾鐘就到東門商場，經扶手電梯上到一樓開始覺唔妥，面同頸開始癢，上到二樓成身都癢，同老公講要走，老公開始鬧，山長水遠黎到，睇都未睇就叫走，再行多唔夠一分鐘，我身內好似發高燒，好似比火燒咁滾，決定離開，開始邊行邊喊，老公見我開始口腫面腫，拖住我半行半跑搵路走，見到有樓梯即去，落左一層後老公叫我向前望，千奇唔好望兩邊，當時我燒到打唔開對眼，靠一條線既視力睇路，又燒到手軟腳軟，佢拖住我行去邊就行走邊，原來呢層係賣肉既街巿，有一隻二隻脫左毛既狗連頭掛係度賣，若果我見到可能會暈低都未定

終於離開左商場，老公拉住我左搵右搵，搵到巴士站，上左巴士返酒店，巴士上既人好怕我，落車入酒店，坐電梯上房，係鏡見到自己個樣變左9成，真正既亞媽都唔認得，全面腫得好利害，一舊二舊，好驚完全唔知點算，老公估計我又係對污濁既空氣敏感，一入房就叫我除衫沖涼，我不停沖不停沖，沖左半個鐘，開始無咁癢先停，照鏡見到自己全面全身又紅又腫，不停喊不停喊，佢叫我抺乾身唔好著衫坐上床，冷氣教到最細，等微風吹上身加快消腫，一直等，再等，等左幾個鐘，開始消腫，再等多個幾鐘，個樣變返正常既七成，落樓下食飯

幾個鐘頭前，真係覺得會死係東門商場，平時口口聲聲話只怕痛唔怕死，但到左面對死亡既威脅，原來係會好驚

訓醒返香港，消左九成腫，由事發開始，足足48小時，先完全消腫